Danggä für alles, Geri

Churz bevor mir a dä Zämäkunft am 11.11.2022 i dä Chronä d’Jubiläumsfasnacht so richtig händ chönä lanciere, händ mir d’Nachricht vom Abläbä vom Geri Kühne müesse entgägänäh. Gern hetät mir zämä mit üserem Fasnachtsurgestei diä verschiedene Jubiläumsaktivitäte erläbt. Vieles, was üseri hütig Fasnacht usmacht, got uf d’Initiative vom Geri zrugg.

Gemäss üs vorliegende Ufzeichnige isch dä Geri im Januar 1970 als Biisitzer i diä damalig Fasnachtskommission gwählt wordä. Das isch inere Ziit passiert, wo d’Fasnacht no uf unbeständige Bei gschtandä isch, und über Durefüehrig vo dä fasnächtliche Aktivitäte Jahr für Jahr diskutiert und churzfrischtig entschiede wordä isch. Siither isch dä Geri mit dä Bänggner Fasnacht starch verbundä gsi und hät verschiedeni Funktione innerhalb vo dä Fasnachtskommission übernoh. Er hät mit sine Ideä frischä Wind is Bänggner Fasnachtstriibe bracht. So hät er biispielswiis vorgschlagä, än Chindermaskäball für d‘Beläbig vo dä dorfeigene Fasnacht z’organisiere. Im Wiitere isch er Mitbegründer vo dä legendäre «Rätschi Wiber» gsi. Ä illuschtri Mannägruppä, wo jahrelang mit Schnitzelbanggä und spöter ihrnä Rätschi-Söng für beschti Underhaltig gsorgät hät.

Im Februar 1973 ischäs ebäfalls dä Geri gsi, wo sinä Kommissionskollegä vorgschlagä hät, jewiils jährlich ä eigeni Plakettä produziere z’la, mit eigenem Sujet zumänä passendä Motto. Im Wiitere hät er damals au agregt, än Maskä- oder Kostümball z’verastaltä. Diä Idee isch damals uf fruchtbare Bodä ghiit. Sit 1974 händ mir ununderbroche äs Fasnachtsmotto, handbemalti Plagettä mit passendäm Sujet und än Kostümball, wo vom Bänggner Fasnachtsprogramm nümä wägzdänggä isch. Bi dä Premiere vom Kostümball im Jahr 1974 isch mit äm Balz Manhart zerscht Mal än Tschämpien ernännt wordä. Dä Geri hät damals bi dä Geburtsschtund vo dem Ehrätitel als «Heb am» gwürkt. 49 wiiteri Tschämpien hät er jewiils am Schmutzige Dunschtig alässlich vom Kostümball mitere wortwitzige, vielfach bewusst irrefüehrendä, einzigartige, amüsantä und spannendä Tschämpien-Red kürt. Sini Uftritt i dä Bütt händ jewiils zu dä Höhepünkt zellt. Im Jahr 2013 isch ihm sälber dä Titel zum Ehrätschämpien verliehe wordä. Das als Dangg für sin grossä Iisatz und sis langjährige und unermüedliche Schaffä für d’Bänggner Fasnacht.

Im Wüssä um sini Gsundheit, hät er sich am 49. Kostümball vo dä Bütt verabschiedet. Mit ihm hät üs äs richtig häxtravagants Fasnachtsurgestei verlah. Danggä für alles, Geri. 



«häxtravagant», s’Motto passend zur Jubiläumsfasnacht!

Im Jahr 2023 werdät verschiedeni Bänggner Fasnachtstraditionä bereits zum 50. Mal duregfüehrt. chgeführt. S’Motto, Plakette, dä Kostümball und d’Ernennung vom Tschämpien gits a dä kommendä Fasnachts bereits siitämä halbä Jahrhundert. Wahrlich zahlriichi Gründ zum Fiirä.

 

Diä kommend Jubiläumsfasnacht staht ganz underem Motto «häxtravagant». Los gats am 3. Januar mitem erschtä Plakettämalabig. Abgschlossä wird diä füüft Jahresziit am 21. Februar mit dä Suppälöfflätä, dä Türggä-Buzzi-Verbrännätä und am Abig mit dä Uslumpätä und dä Tschämpiens-Liig. Es empfiehlt sich, diä zahlriichä Programmpünkt vo dä kommendä Fasnacht bereits hüt i dä Agända z’reserviere:

 


Tsiischtig, 3. Janua

Erschtä Abig Plakettä malä

Friitig, 6. Januar

Ischällä

Dunschtig, 12. Januar

Fasnachts-Referat vom Andreas Winet im Rössli Saal

Samschtig, 21. Januar

Eröffnig vom Bänggner Fasnachtswäg, Kinderfasnachtsnamittag mit verschiedene Pöschtä und am Abig Kärrhöna goes ..…??

Dunschtig, 27. Januar

Letschtä Abig Plakettä malä

Samschtig, 4. Februar

11er-Maskäball im Rest. Rössli und im Saal

Motto: „50 Jahr Bänggner Fasnacht“

Musikalischi Underhaltig under anderem mitem Trio Hoch-Ybrig und äm Ländlertrio Augenschmaus

Schmudo, 16. Februar

Chessletä, Türggä Buzzi – Ufzug, Piccoloball, 50. Kostümball «häxtravagant» mit Gala-Dinner (Türöffnig bereits ab 17.30 / Programmbeginn vorussichtlich zirka 18.30)

Friitig, 17. Februar

Oranschnä mit de Bürglitüüfel, Chinderdisco mitem Jugendteam

Samschtig, 18. Februar

Der Jubiläums-Umzug

Mäntig, 20. Februar

Priisjassä im Rest. Rössli und am Abig Schnitte i dä Rest. Erle und Chronä

Zischtig, 21. Februar

Suppälöfflä mit dä Reflexer, Türggä Buzzi verbränne, Tschämpiens-Liig und Uslumpätä 


Plakettä Maldatä

 

Tsischtig, 3.1.2023    

Mittwuch, 4.1.2023    

 

Mäntig, 9.1.2023

Tischtig, 10.1.2023

Friitig, 13.1.2023

 

Mäntig, 16.1.2023

Tsischtig, 17.1.2023

Mittwuch, 18.1.2023

Dunschtig, 19.1.2023

 

Mäntig, 23.1.2023

Mittwoch, 25.1.2023

Dunschtig, 26.1.2023

 

jewiils ab 19.30 Uhr 


 Hauptversammlung

Liebe Vertreterinnen und Vertreter der aktiven und ehemaligen Bänggner Fasnachtskliggen

Der 11er-Rat lädt euch gerne zur diesjährigen Hauptversammlung der Bänggner Fasnachtsgesellschaft - am 11.11. natürlich - ein. Bitte beachtet die Einladung an der Seite

(Vor)Fasnächtliche Grüsse

11er-Rat Bänggä